《回到家鄉的第1日》
我哋由「較安全」嘅埃及飛返去意大利，大體都知道唔洗被強制隔離。不過我哋一盡公民責任，為己為人，更加為了意佬屋企人，我哋將會自我隔離起碼14天，有必要時再自我延長隔離期。
意佬姐夫好好，喺我哋未返到屋企之前幫我哋買定哂所有糧食同日用品，可惜係買唔到消毒劑。
重點係：口罩-有！原本二月初姐夫幫我向醫生診所撲口罩，對家應承我哋分兩批每批5盒，但因為一直等緊第二批罩所以遲遲未寄返香港，估唔到事隔一個月，竟然錯有錯著下造福咗自己，喺意大利有口罩用。
廁紙-都有😃朋友仔都擔心我哋會唔會冇廁紙用，可能我哋住喺中部，加上廁紙喺意大利人角度真係唔算必必必須品，因為有偉大嘅bidè(菊花台)可以洗patpat🐒所以姐夫話咁易就買到兩pack廁紙。
愛仔深切嘅奶奶仲準備埋自家麵包同肉腸同肉丸，配埋中部特產紅酒，呢個隔離營實在太有愛❣
我哋兩公婆分工合作，我就負責dirty job, 將所有行李裡裡外外嘅所有東東逐一消毒，又係咁洗衫晾衫，仲攰過喺埃及返工😑意佬就配合吓，消毒吓廚房咁。睇嚟超市已經冇消毒劑賣，好彩喺埃及老佬時不忘笠埋支滴露返嚟，依家仲有半支，希望夠用啦～
#意大利隔離實錄
#消毒消毒消毒
#洗手洗手洗手
#一切安好
#請放心😊
Search